Арын кундемысе памаш-влак

Кугу памаш
Нуръял Карамас ял воктен, курык йымалне,
Кугу памаш вийым налын, йыргыктен лектеш. Иктат ок шарне, кунам тиде памаш шочын, ӱмырем мучкак уло, манеш Евдокия ковай.

Кугу сар деч вара калык Кугу памаш деч ял мартеак кужу трубам шупшын, вуд ялышкак йоген пура, воктен изирак пӱям авырен шынденыт.

Чодраял памаш
Памаш вӱдым урзо тич кошталын,
Шинчавӱдым пуйто кидыштем кучем…
Тыге возен поэтесса Татьяна Пчёлкина.
Яндар вӱд памашшинча гыч пӱяш йоген лектеш, тушто кол куанен ила.

Освятитлыме вӱд йӱдшӧ-кечыже йога.
Тышке калык вӱдлан вола,
юмылан тауштен, яндар вӱдым переген налеш.

Арын селасе памаш
Арын селасе черке дечын иктаж кокшӱдӧ метр
тораштырак,Поп-курык йымалне вес памаш верланен.
Памашым ял калык сайын эрыктен шынден, вӱдлан
шке ял гыч веле огыл, уло Марий Эл гычак толыт.
Виян вӱд маныт, черым поктен луктеш.

Вес могырышто купельым ыштен шындыме, калык чывылалташ вола: капым кандараш, чер деч эрнаш,уш-акылым волгыдемдашат вӱд полша.