Чингис Гуруев. Ородой Холбоото Уласай габьяата артист

Чингис Цыренович Гуруев
Хэжэнгын аймагай Хѳѳрхэ нютагта
1945 оной сентябриин 27-до түрэhэн.

«Гγлмэрхэн залуухан наhан –
hургуулиин хаhа…»
… Эрдэни номын hургуули
Эхэ нютагтаа суутай юм.
Ашата багшын заабари
Алтан мэтэ γнэтэй юм.
Чингис Гуруев

Ленинградай Гүрэнэй театрай, хүгжэмэй болон кинематографиин дээдэ һургуули 1969 ондо дүүргээд, Х. Намсараевай нэрэмжэтэ Буряадай гүрэнэй академическэ драмын театрта ажаллаа. Чингис Цыренович түрэл театрайнгаа тайзан дээрэ 100 гаран элдэб абаритай дүрэнүүдые байгуулжа, харагшадтаа бэлэглээ.

1991 онhоо мγнѳѳ болотор Сагаан hарын найр нааданай
гол зγжэгшэн юм.

П. И. Чайковскийн нэрэмжэтэ дунда мэргэжэлэй хүгжэмэй һургуулида Чингис Цыренович багшалжа, оюутадтай дүй дүршэлөөрөө хубаалдаа. 2010 онhоо «Буряад үнэн» хэблэлэй байшангай хэблэлэй таhагта редактораар хүдэлөө.

Уран шүлэгшэ, зохёолшо Чингис Гуруев «Харгы» (1975), «Үндэр тэнгэри» (1985), «Үлзы хэшэг» (2003), «Хуһахан» (2005), «Амин гол» (2015), «Хэбэд номхон Хэжэнгэ» (2017) гэhэн шүлэгүүдэй номуудые хэблүүлэнхэй.

Ородой Холбоото Уласай урлалай габьяата ажал ябуулагша, мэдээжэ хүгжэм найруулагша Владлен Пантаевтай хамта зохёоһон дуунуудынь үргэн Буряадтаа мэдээжэ болонхой.

ХУhАХАН
Yгэнь: Ч. Гуруевай
Хүгжэмынь: В. Пантаевай
Нарhан тужын захада
Нахилзана хуhахан.
Жэлэй дүрбэн сагта
Зүhэ шэгээ хубилгана.
Алтан наран соо наадажа,
Арюун агаараар амилан,
Хурын уhаар ундалжа,
Хүхэрэн гоёор ургана.
Наартай үндэр хуhахан
Наhаараа намтай сасуу юм.
hэбшээ hалхинтай шэбэнэлдэн,
hэршэгэнэн байхань зохид юм.
Дуулим үдэшөөр нютагтаа
Дуугаа дуулан ябахадаа,
Дунхан сагаан хуhаяа
Дүүхэн шэнгеэр тэбэригшэб.
Буряад арадай дуун болоhон «Хуhахан»

Чингис Гуруевай эрхим зохёолнууд һурагшадай уншаха хрестомати болон һуралсалай номуудта оруулагданхай.

Чингис Гуруевай нэрэ зэргэ болон шагналнууд:
1976 он –«Буряадай габьяата зγжэгшэн»
1990 он – «Буряад Уласай арадай артист»
1997 год – «Ородой Холбоото Уласай Уран зохёолшодой холбооной гэшүүн»
2000 год – «Эрдэмэй болон соёл урлалай Петровско академиин гэшүүн-корреспондент»
2000 год – «Ородой Холбоото Уласай Сэтгүүлшэдэй холбооной гэшүүн»
2010 год – «Ородой Холбоото Уласай габьяата артист»