Тывызыктың тыптып келген төөгүзү, сорулгазы, хүлээлгелери

Тывызык деп билиишкин эрте-бурунгу грек философ Аристотель үезинде-ле тыптып, билдинип келген. Ол тывызыкты «тургузуу эки метафора» деп тодарадып адаан.
В.П. Аникин «Русские народные пословицы, поговорки, загадки и детский фольклор» деп ажылында мындыг тодарадылганы берген: «Тывызык дээрге кижиниӊ сагынгыр-тывынгыр чоруун шылгаар сорулгага-биле кандыг-бир предметти болгаш болуушкунну поэтиктиг чурумал-биле кѳргүзери-дир»

Тывызыктыңукталган дѳстери кижи тѳрелгетенниӊтыптып келген үезинде-ле кандыг-бир чүвени ойзу адаары-биле тывылган деп эртемденнер санап турар. Эгезинде ону багай «кара күштерни» ажы-төлүнден, мал-маганындан, аал-оранындан чайладыр сорулгалыг чон ажыглап чораан. Ынчангаш тывызыктыӊ баштайгы хүлээлгези багай чүве билип кагбазын дээш, кандыг-бир чүвени ойзу чугаалаары турган. Ол үедеги тывызыктарныӊ утказы тараа-быдаа дүжүткүр, чаагай, мал-маган онча-менди болурунчеугланган турган.

Бурунгу үеде тывызык чүдүлге, ѐзулал-биле сырый холбаалыг чораанының уржуундан ону ыдары, тыптырары дээрге бир элдеп-эзин күш база мерген угаанныӊ херечизи деп санаттынар турган. Тывызыкты чон кайы хамаанчок ытпас чораан. Ону колдуунда күзүн азы кыжын хүннүӊ ажылы доосту бээрге, бир ѳгге чыглып алгаш, маргылдажып ыдар.

Тывызыктажыры тускай чурумнуг: бир кижи тывызыктап эгелээрге,ѳскелери кичээнгейлиг дыңнааш, тывар. Олар харыызын элээн үр тып шыдавайн барган болза, баажызы чүдел дээрзин айтырар. Тывызык салган кижи тып турар чүвениӊ чүге хамааржыр бѳлүүнайтып бээр. Чижээлээрге, бойдуста, эдилелде, кижиде дээш оон-даа ѳске. Харыыны шуут тып чадап каан болза, догааштырар, удур тывызык салыр. Бир эвес догааштырган тывызыкты удур тала тып шыдавайн баар болза, ийи тала тывызыктарыныӊ харыызын бот-боттарынга адап бээр. Баажызын адаары, догааштырары ѳске чоннуӊ тывызыктарынга дѳмейлээрге, тыва улустуӊ тывызыктажырыныӊ онзагай, солун талазы болур.

Тыва улустуӊ аас чогаалындан хайгаарап кѳѳрге, тывызык кандыг-бир дүрзүхевирни бак сѳглээр, одаар, мактаар, ооң кол демдектерин чеченчидип кѳргүскенинден тывылган болур. Ону тыва улустуӊ
«Арганыӊ ак коданы»деп тоолундан кѳрүп болур: Адыгныӊ бичии оолдарындан кодан иезин айтыргаш, ону мынчаар сөглеп турар: «Ол-даа кулугурну! Башкы буду майыжаӊнаан, сонгу буду шоюжаӊнаан, арга-даш кезип чорааш, кызыл-кымыскаяк, кызыл курттан ѳске тып чиир чүвези бар эвес. Адыгга көшкүрүүрде, хѳвеӊ дег ак дүктүг мен, хойнуӊ эъди дег хонук чедер эъттиг-даа мен, аңаа көшкүрүүрде, аяк ишти ханныг-даа мен.., дүңдерлиңнээн дүрзүнчүг, андарлыӊннаан арынныг кулугур»…Адыг келгеш, ону дыӊнааш, аажок хорадап, база-ла: «…Херги шыдаар кештиг эвес, деспи долар эъттиг эвес, аяк чедер ханныг эвес, агара када берген, арганыӊ ак коданы, чер сен кулугурну мен адыр»– деп кыжаныр.

Бо ийи амытанныӊ бот-боттарын удур-дедир сѳглешкен кылдыр аас чогаалын ажыглааныныӊ түӊнелинде ѐзулуг тывызыктап болур домактар, тывызыктар тыптып келген.

Ынчангаш тыва улустуӊ тывызыктажыр чаӊчылы амгы үеде сайзыралды ап,
дараазында хүлээлгелерни күүседип чоруур:
1. Долгандыр хүрээлелди шиӊгээдип алырынга дузалап чоруур.
2. Логиктиг боданыышкынны, мээ-медерелди, хайгаараачал чорукту сайзырадып
чоруур.
3. Делегейни янзы-бүрү овур-хевирлер дузазы-биле шиңгээдип алырынга
дузалап, делегей кѳрүүшкүнүн хевирлеп чоруур.

Ынчап кээрге, тывызык – эрте-бурунгу билиишкин, ол кижиниӊ угаан-медерелиниӊ деӊнелин тодарадырынга дузалыг арга болур. Тыва улустуӊ тывызыкка хамаарыштыр национал тускай шынары – тывызыктажырыныӊ чурумунда. Ѳске чоннарныӊ тывызыктарынга дѳмейлээрге, тыва улустуӊ тывызыктары бир онзагай ылгалдыг бооп турар. Ол дээрге тывызыкты ыдарыныӊ чуруму-дур. Оон аӊгыда, үениӊ агымыныӊ аайыбиле сайзыралын чидирбээн. Тывызык эпостан укталган жанр болур, ону үстүнде киирген чижек бадыткап турар.

Тывызыктарның эң-не эрте-бурунгу баштайгы хевириниң бирээзинге кандыг-бир
чүвениң дугайында айтырыгга тывынгыр харыылап турар чечен-мерген дорт чугаа
хевирлиг тывызыктар хамааржыр деп эртемден О. К. Дарыма бижээн. Чижээ:
‒ Чүү-даа чүве чүге хая көрнүрүл?
‒ Чүге дизе соонда караа чок болганда.
‒ Шуут согур амытан кандыг болуксаарыл?
‒ Чаңгыс-даа болза карактыг болуксаар.
‒ Сугда кандыг даш чогул?
‒ Кургаг.
‒ Чүү эгиттинмезил?
‒ Чалыы назын эгиттинмес.