Нематодалардың экологиялық топтары . Фитогельминттер мен ие - өсімдік арасындағы қарым - қатынас

Мазмұны
1. Тамыр маңындағы нематодалар (параризобионттар)
2. Белгілі сапробионттар (эусапробионттар)
3. Белгілі емес сапробионттар (девисапробионттар)
4. Фитогельминттер

Тамыр маңындағы нематодалар (параризобионттар)
Бұл топқа жататын нематодалар өсімдікпен тікелей немесе жанама байланысты. Олардың үшкір шаншығышы жақсы жетілген, сол арқылы өсімдіктің шырынымен қоректенеді (өкілдері Dorylaimidae тұқымдастары), кейбіреулері топырақ жыртқыштары Mononchidae тұқымдасына жатады. Тамыр маңындағы нематодалар афазмидия класс тармағына жатады.

Белгілі сапробионттар (эусапробионттар)
Бұл топқа жататын нематодалар шырып жатқан ортада тіршілік етеді. Олардың кейбіреулері қураған ағаштарда, екінші - шырынды тамырларда, үшіншісі – жансызданған өсімдіктің жасыл бөлігінде кездеседі. Ас қорыту мүшесі ерекше орналасқан. Ферменттері бактерия ферменттерінің жұмыстарын жалғастырады. Эусопробионттар өз бетімен өсімдіктерді зақымдамайды, бірақ инфекцияны таратады.

Белгілі емес сапробионттар
Бұлар шіріген ортада тіршілік етеді, бірақ девисапробионттар өсімдіктің тірі ұлпаларында да кездеседі. Бұларға цефалобидтер жатады.

Фитогельминттер
Бұл топқа өсімдіктерге зиян келтіретіндер жатады. Ас қорыту бездері жақсы жетілген, олар ие - өсімдігіне айтарлықтай әсер етіп, нәтижесінде залалданған мүшелерімен қатар өсімдікте түгел өзгеріс пайда болады. Олардың стилеті болады, ал кутикуласының өткізгіштік қабілеті төмен. Бұларға тиленхоидтар және афеленхоидтер жатады.