Эмине Усеиннинъ иджады ве бала китаплары

1972 сенеси Наманган виляетининъ Чуст шеэринде дюньягъа кельди

1991 сенеси Чуст педагогика окъув юртуны битирип, севимли Ватаны Къырымгъа кочип кельди.

1993 с. – 2008 с.
башлангъыч сыныф оджасы олып чалышты

Сонъра В.И.Вернадский адына ТАВРИЯ МИЛЛИЙ УНИВЕРСИТЕТИ филология факультети къырымтатар тили ве эдебияты болюгининъ мезуны олды.

Шиирлери «Къырым», «Янъы дюнья» газеталарында ве «Йылдыз» меджмуасында басылды

2008 ве 2009 сенеси
«Ильхам гульдестеси» киби эки джыйынтыкъкъа онынъ эсерлери кирсетильди.

2016 сенеси учюнджи буюклер ичюн
«Кефе Лялеси» шиирий китабы Анкъарада басылды ве Анкъара Миллий Кутюпханесинде такъдими кечти

Эмине Усеиннинъ бала китаплары: 1.) 2009 сенеси «Алтын Кунеш» адына биринджи шиирлер топламыны да бастырды.
Балаларгъа багъышлангъан бу джыйынтыкътаки шиирлерге озю ресимлер сызды.

2011 сенеси балалар ичюн «Айванат алеми» экинджи шиирий джыйынтыгъы нешир олунды.

2017 сенеси декабрь айында «Гузеллик алеми» балалар ичюн шиир ве икяелер китабы дюнья юзюни корьди

1 яшындан 2 яшына къадар балалар ичюн эсерлер
Шаиирлер-балаларгъа
«Беклесин мени алем»
Бу дюньягъа мен келем,
Беклесин мени алем,
Юрегим эп дёгюне,
Аначыгъым севине.
Омрюм, манъа кулип бакъ,
Ёлум олсун даим акъ.
Саф юречигим дуя:
Насыл экен бу дюнья?
«Ильк сёзлер»
Ильк сёзюм олды - «ана»,
Экинджи сёз бу – «баба»,
Ондан сонъ «бита» олды,
Сонъ агъзым сёзге толды.

2 яшындан 3 яшына къадар балалар ичюн эсерлер
ШАИРЛЕР – БАЛАЛАРГЪА
«Чипче»
«Чип-чип-чип-чип», эп ойнай,
Истесе, барып юкълай,
Чюнки даа пек кичик,
Тюкю сары, къувурчыкъ.
«Папийлер»
Папий, папий, папийлер,
Сувда ялдап кетелер,
Оларгъа мен ем сепсем,
«Пи-пи-пи» деп келелер.

3 яшындан 4 яшына къадар балалар ичюн эсерлер
ШАИРЛЕР – БАЛАЛАРГЪА
«Сансар»
Кузьде меним ишим чокъ,
Чалышмасам – емек ёкъ,
Фындыкъ, джевиз джыярым,
Къышта ашап тоярым.
«Аюв»
Озенде балыкъ авлай,
Бульдюрген ве бал ашай,
Юре дагъда, обада,
Къышта юкълай къобада.

5 яшындан 6 яшына къадар балалар ичюн эсерлер
ШАИРЛЕР – БАЛАЛАРГЪА
«Кок парчасы»
Кок парчасы элимде,
Тынчлыкъ сача алемде.
Миллий дуйгъулар ашлай.
Ватанымны алгъышлай.
Халкъыма о кучь бере,
Догъру ёлны косьтере.
О меним кок гъурурым,
Мен девлетни къурарым!