Иньва дорын

Иньва дорын
«Коми мужиктö ыпыöн шуöмась…
…сьывны ладом оз куж – то баксö, то голоссö кыскалö. А кин сійö сьывны велöтіс?
А сія, кин сы гöгöрын оліс: мöс – буавны, вöв – гöрдлыны, баля – баксыны, петух – базанитны,пон – эравны да уннявны. Ачыс тшыг не пöт оліс, и сьöлöмыс нора да бöрда вöлі».

ЛОВЗЬÖ ЛОВ

Мый понда сетöм сьыланкыв миянлö?

Мед кöркöся оліссезлісь Л О В

вежöртны миян талуння оланын

и одзланься лоанувтырлö сетны говк.
В.В.Козлов

ÖТКА МОРТЛÖН МЫЧЧАСЯН
СЫЛÖН НИМ -
ДЕЙКО ÖЛЬÖШ МИКОЛ

Ме айкаыс деревенскöй, меын эм и чуд, и ЕН.
В.В.КЛИМОВ

В.В.Козлов
Лов
Эм миян оланын мыйкö сэтшöм,
Кöдö синöн адззыны ог вермö,
Кöдö киöн пешлыны ог вермö,
Кöдö пельöн кывзыны ог вермö –
Эм миян оланын мыйкö сэтшöм.

Этö – ЛОВ, кöдö адззыны ЕН оз сетлы;
Этö – ЛОВ, кöдö вежöртны ЕН оз сетлы;
Этö ЛОВ, кодö сьылöтны ЕНЫС сетö;
Этö ЛОВ кöдія ачыс пырö – петö.

ЛОВЗЬÖ ЛОВ

В.В.Козлов
Мияндын лок

Кöр козьналас льöмпунымлö тулыс
Чочком рöма дзоридза йöрнöс,
Кöр вежöтас юрыс горадзульлöн,
Енöжыс кöр лоас лöзся-лöз-

Сэк миян дын лэбзьы бабылокöн,
Сэк сьöдкайöн кыдз выланым лок,
Сэк пöльтышт чужöманым тöлокöн,
Сэк мияндын лок, мияндын лок.

Кöр турун ми пондамö дзимлявны,
Кöр ва дорын воас сьöд сэтöр,
Кöр иньдöтчам вöрö малинавны,
Кöр мичамас зэр бöрын öтöр –

Сэк енöшка рöммезöн мыччись тэ,
Катшасинöн сэк миян дын лок,
Чочком юсьöн енöжö лэбтісь тэ,
Сэк мияндын лок,
мияндын лок.

Кöр вежöтас кыдззэзнымлöн корыс,
Парманымöс коляс кай чукöр,
Кöр тшакьявны вöр миянöс корас,
Кöр кöс шыöн сьывны пондас зöр –

Сэк мыччись пелыс вылын гöрд рöмöн,
Тури говкöн сэк мияндын лок,
Сэк мияндын лок тэ зэр горзöмöн,
Сэк мияндын лок, мияндын лок.

Чочком лым кöр тыртö жагвыв мусö,
Кöр морозсянь гöрд лоö чужöм,
Кöр лолалам сöстöм кöдзыт русö,
Кöр пургалöн кылö уннялöм –

Ки вылö сэк усь тэ лымчирокöн,
Пемыт ойö тэ тöлісьöн лок,
Сэк мыччись öшынын узöрокöн,
Сэк мияндын лок, мияндын лок.

ЛОВЗЬÖ ЛОВ