Таныжыңар чаа ном

Хүндүлүг номчукчуларывыс, тыва дылдың болгаш чогаалдың мөгейикчилери!
Тываның улустуң чогаалчызы, Россияның чогаалчылар эвилелиниң кежигүнү Шаңгыр – оол Суваңның чогаалдарын чон сонуургап номчуур, чүге дээрге ооң чогаалдарының маадырларының овур – хевирлери нарын, психологтуг талазы – биле сонуурганчыг. Ол болза колдуунда проза жанрынга ажылдап чоруур.
Бо чаа үнген чогаалдар чыындызында чогаалчывыстың аңгы – аңгы чылдарда үнген тоожулары, чечен чугаалары, шүлүктери, очулгалары, уругларга чогаалдары, чогаалдарының дугайында сайгарылгалары долузу-биле кирген.

Ш. Суваңның чогаалчы ажылының эгези 1970 – 1980 чылдарның ортаа үези. “Тываның аныяктары” солунга 1976 чылдың июнь айда “Оглум чазы” деп шүлүү парлаттынган. Ол шүлүктү салым – чаяанныг композитор Владимир Тока эскерип кааш, сөзүнге аялганы бижээн. “Оглум чазы” деп ыр хөй ыраажыларның ынак ырызы апарган. Владимир Тока биле Шаңгыр – оол Суваң “Дуруяа” деп ырны база бижээннер.